08.05.2012, 16:02
ЕКОЛОШКА КАТАСТРОФА НА НАЈМЛАДОТО ВЕШТАЧКО ЕЗЕРО
Депонии пловат по Козјак
Тони ѓубре пливаат во езерото Козјак. Во заливите водата не се гледа, бидејќи површината на езерото е прекриена со пластични шишиња, ќесиња, трупци, гранки и со трева.
Пловењето по Козјак во последниве неколку месеци не им е задоволство дури и на најупорните. Покрај тоа што мораат да внимаваат на потопените дрвја, чии гранки стрчат од водата, принудени се, пловејќи, да ги одбегнуваат депониите кои на огромна површина доаѓаат од правецот на Кичево и на Македонски Брод.
Членовите на здружението на граѓани за екологија "Еко екипа" од Скопје биле единствените што го ваделе од езерото ѓубрето кое плови, но и тие престанале бидејќи им прегореле моторите на чамците. Во акцијата, која ја почнале на трети април, од водата извадиле повеќе од педесетина кубици пластични шишиња и друг отпад. Дел од пластичните шишиња ги пренеле во откупните отпади, а дел сe уште стои на брегот во село Близанско.
"Ова што му се случува на езерото е вистинска еколошка бомба. Пластиката не скапува и е закана за целиот жив свет. Ние во здружението 'Еко патрола' сме рибари, и токму рибарејќи увидовме дека некој мора да го чисти езерото. Акцијата почнавме да ја планираме уште лани во септември. Тогаш побаравме помош од Јасен, од Министерството за екологија и од некои фирми. Помош не добивме од никаде, па затоа се организиравме сами. Едни донесоа чамци, други бензин, комбе за изнесување на ѓубрето, и ја почнавме акцијата. Но пред две недели моравме да ја сопреме, бидејќи ни се расипаа моторите на чамците. Не им е првпат, стари се и постојано ги поправаме", вели Илија Кипровски, претседател на здружението "Еко патрола".
Ја исчистиле едната страна од езерото, односно делот кај Здуње, новата населба, село Близанско до Брезница, а за чистење останува делот од Здуње до браната. Езерото во мај се полни, се крева нивото, па секојдневно во него се враќа и неисчистеното ѓубре од лани кое, со повлекувањето на водата, останало на брегот. Постојано доаѓа и ново ѓубре. Кипровски вели дека овој период додека не можат да работат, ќе го искористат да најдат спонзори за акцијата.
"Се финансираме сами, кој колку има, а спиеме во трпезаријата на поплавената црква 'Св. Арангел'. Клисарот ни даде одлични услови за сместување. Место да спиеме во шатори, спиеме во трпезаријата. Тука и си готвиме јадење. Можеби не е најдобро, но нам ни одговара бидејќи сите сме вљубеници во езерото. Се надевам дека ќе успееме да најдеме некој што ќе ни помогне во акцијата. Ако ништо повеќе, барем да ни ги поправи моторите бидејќи ние истрошивме сe што имавме", вели Кипровски.
Од јавното претпријатие Јасен велат дека не чудно што езерото е наполнето со ѓубре, бидејќи речиси една и пол година никој не го чисти.
"Ние го чистевме езерото до крајот на 2010 година, но договорот за концесија ни истече во јануари 2011, и оттогаш Законот не ни дозволува да трошиме средства за таа намена. Нов концесионер нема, Министерството за земјоделство, шумарство и водостопанство го одолжи изборот, а во меѓувреме, езеро се полни со ѓубре, риба лови кој стигне и неговото уредување е запрено", вели директорот на Јасен Михаил Малахов.
Тој потврди дека од "Еко патрола" побарале помош од нив за чистење на езерото, но не направиле спецификација за тоа што го бараат и не дошле да потпишат договор, па поради тоа останале без помош.
Од Министерството за земјоделство, шумарство и водостопанство велат дека концесијата за Козјак има ист третман како и концесиите за останатите езера во Македонија, и најавуваат дека до крајот на јуни годинава ќе биде избран новиот концесионер. Од таму не кажаа зошто дозволиле повеќе од една година езерото да нема концесионер.
(М.И.П.)
FФото: Д. Перковски