Изгледа некој почнал да го прати форумот и апелите од риболовците- чим не има и во новините
Рибарите бараат риболовна полиција
Физичка заштита и формирање риболовна полиција се клуч за успешна заштита на рибниот фонд и неговиот подмладок во македонските реки и езера, сметаат најголем дел домашни риболовци
РИБОКРАДЦИ ГИ ПУСТОШАТ ЕЗЕРАТА И РЕКИТЕ
Пасионираните риболовци деновиве зачестено по социјалните мрежи бараат државата да направи посебен оддел или некој вид риболовна полиција што би се грижела исклучиво за заштита на рибниот фонд, особено за време на мрестот, кој заврши неодамна. Процените за тоа колку е уништен рибниот фонд сѐ уште се изработуваат, а во МВР велат дека се отворени за соработка и очекуваат заинтересираните да поднесат официјален предлог до нив за да може институционално да реагираат.
- Крадењето риба е најактуелно во време на нејзиниот мрест, кога рибите се доближуваат до брегот и се особено ранливи. При ваквото рибокрадство се прави неизмерна штета, затоа што со секоја риба што е земена за време на мрестот се убива цела следна генерација. Формирањето риболовна полиција, или барем оддел при МВР што постојано би се занимавал со оваа проблематика, би дало резултат - сметаат надлежните од стручната веб-страница „Рибар“.
НАЈМАЛКУ КРАДЕЊЕ КАЈ ЕЗЕРА СО КОНЦЕСИОНЕР
- Идејата треба да се достави до МВР во форма на предлог, во кој ќе има анализа и процена на состојбата. Потоа, ќе се разгледа кои се добрите и лошите страни на предлогот и како би можело да се изведе. Ова е потребно оти треба да се разговара и со други министерства, затоа што кога станува збор за риболовство и рибокрадство ингеренциите се преплетуваат во неколку министерства - изјави Иво Котевски, портпарол на МВР.
Според познавачите на состојбите, мрестот на рибите секоја година континуирано е напаѓан од рибокрадци што на секој можен начин ја уништуваат природната одржливоста на рибниот фонд. Процената на штетата сѐ уште не е направена, но за превенцијата со физичка заштита на водните ривиери се и експертите.
Случаите на нелегален риболов драстично се намалуваат кај езерата што имаат концесионер, како што е Охридско Езеро, истакна Државниот инспекторат за земјоделство.
- Во однос на 2012-та, во 2013 година има зголемување на бројот на поднесени пријави за повеќе од сто отсто, што значи дека активноста на сите субјекти за заштита на рибниот фонд е многу зголемена. Со сите мерки, рибокрадството е намален за 80-90 отсто - изјави Јован Бојчовски, државниот инспектор од охридското одделение за рибарство и аквакултура.
Како позитивен пример за успешно функционирање на физичкото обезбедување како мерка против рибокрадците, според надлежните, е Охридско Езеро. Откако лани беше земено под концесија има постојана физичка заштита. Формирана е рибочуварска служба, која има 64 вработени што дење-ноќе го чуваат езерото од Свети Наум до Калишта. Вработените работат со соодветна опрема за ноќно набљудување и современи моторни чамци, а сето тоа резултира со намалување на случаите на рибокрадство за 95 отсто.
НАЈМНОГУ РИБОКРАДЦИ ВО БИТОЛСКО
За незаконски риболов лани во Министерството за внатрешни работи биле пријавени 44 сторители, а до мај годинава биле пријавени 12 нелегални риболовци. Најмногу кривични дела имало во битолското подрачје, каде што се евидентирани 14 случаи, а потоа во Охридско, каде што се забележани 10 случаи.
- При реализацијата на овие кривични дела се запленети вкупно 52 мрежи, со вкупна должина од 4.186 метри, од кои во 2013 година се запленети 29 мрежи, со вкупна должина од 3.240 метри. Најмногу мрежи се запленети од регионалниот центар за гранични работи „Запад“ - со вкупна должина од 2.500 метри, додека регионалниот центар за гранични работи „Југ“ има запленето мрежи во вкупна должина од 1.686 метри - велат од МВР.
Од веб-страницата „Рибар“ ни посочија дека на нивниот форум љубителите на риболовот го изразуваат секојдневно својот револт за нелегалното риболовство.
- Таму во посебни теми постојано има некоја актуелност за крадење риба, поставување мрежи, ловење риба со динамит и со струја, со вили и друго.
Рибарите апелираат на формирање полиција што би била пандан на шумската полиција. Шумската полиција беше формирана поради кражбите на дрва, па така бараат да се реши проблемот и со рибокрадците.
Автор: Јасна Атанасова /
jasna.a@novamakedonija.com.mk
ИЗВОР НА ВЕСТА
http://www.novamakedonija.com.mk/NewsDe ... anie=23217