|
Убава вест од К.Паланка и Дебар (извор: Дневник)
Во Крива Река повторно пливаат пастрмки
Решавањето на проблемите со загадувањето од рудникот „Тораница“, забраната за риболов и порибувањето придонесоа Крива и Дурачка Река одново да се наполнат со риби
Поточни пастрмки повторно пливаат во водите на Крива Река, во која до пред неколку години рибниот фонд беше речиси целосно истребен. Сега пастрмки од 500 грама до над 2 килограма можат да се видат и во центарот на градот и се вистинска атракција за граѓаните. Од риболовното друштво „Мрена“ истакнуваат дека тоа е резултат на преземените мерки за отстранување на проблемите околу загадувањето со рудникот „Тораница“, повеќегодишната забрана на риболовот и извршеното порибување.
- Состојбата околу загадувањето на Крива Река од „Тораница“ е видно подобрена со преземените мерки за еколошка заштита од страна на рудникот, а веќе 6 години има и забрана за риболов, која се' уште е во сила во централното градско подрачје. Поточно, во моментов под заштита е ревирот на Крива Река, од местото Самоков до излезот на градот, во должина од околу 6 километри. Заедно со извршеното порибување на Крива и Дурачка Река, сето ова даде резултати во обновувањето на рибниот фонд. Презадоволни сме што водите повторно се полнат со пастрмка - вели Благој Славевски од „Мрена“.
Риболовното друштво изминатите години има обезбедено околу 40.000 парчиња подмладок за Крива и Дурачка Река, како и за другите водотеци во овој реон. Само лани се обезбедени 12.000 броја на поточна пастрмка од кои 6.000 се пуштени во Дурачка, а останатите во Крива Река и во акумулацијата во селото Отошница. Дополнителни количини на подмладок се обезбедени и од Министерството за земјоделство, шумарство и водостопанство.
- Паралелно со порибувањето беше воведена и забрана за риболов од самите извори на Крива Река, која постепено се редуцираше и сега е сконцентрирана главно на периферното и централно градско подрачје. Овие ригорозни мерки се преземени за обновување на рибниот фонд и заштита на подмладокот, иако и понатаму имаме проблеми со рибокрадците. За да не се уништуваат нашите напори околу зачувување на рибното богатство, бараме помош и од полицијата и од локалната самоуправа - вели Славевски.
Од „Мрена“ истакнуваат дека каскадите на реките го попречуваат патот за мрестење на рибите. Најголем проблем е високата каскадата кај вливот на Дурачка во Крива Река, во центарот на Крива Паланка, која е непремостлива пречка за враќањето на рибите во чистите води во горните водотеци.
- Ова е особено проблем за кленот и мрената, кои штом паднат од каскадата не можат повторно да се вратат назад, со што се оневозможува нивното мрестење. Потребна ни е помош од локалната самоуправа затоа што во каскадата е вградена комунална инфраструктура и треба да се бара заедничко решение - велат од „Мрена“.
Дебарско порибено со јагула
Дебарско Езеро деновиве беше порибено со 2.000 единки подмладок од јагула со просечна тежина од 25 грама. Младата јагула претходно престојувала во карантин во струшкото мрестилиште „Шум“ каде што биле извршени неопходните анализи и бактериолошки испитувања.
- Ова е во рамките на традиционалната акција поддржана од АД „Електрани на Македонија“ со цел да се обезбеди обновување и зачувување на овој вид риба во Охридското и Дебарско Езеро - изјави директорот на ХЕЦ „Шпилје“, Љупчо Ангеловски.
На порибувањето присуствуваше и државниот инспектор по рибарство, Лири Делиши, кој искажа верба дека набрзо владата, односно Министерството за земјоделство, шумарство и водостопанство ќе определи концесионер за ова езеро.
_________________
Животот е досадното време помеѓу два риболовни излета...
|
Регистрирај се
Најави се
ЧПП
Членови
