Чикада (cicada) – е една од најинтересните и најатрактивните вештачки мамци во водите во Македонија во последните 3 години. Нивната употреба на нашите езера е благодарност на локалните домашни мајстори и мајстори во соседните земји како и увозници на класичните DAM чикади во локалните продажни места.
Оригиналните чикади потекнуваат од САД (соединетите американски држави) од производителот Reef Runner. Се базираат на имитација на крилести инсекти (Cicadoidea). Конструкцијата на чикадите во суштина е многу едноставна како што е и нејзиниот изглед меѓутоа е потребна голема количина на хидродинамика. Целиот облик на чикадата го сочинува телото нејзино кој е карактеристично обликуван во форма на триаголник и отежнувањето кое формира целина заедно со трокуките кои се најобично 2 пара. Како втор фактор за успехот на овој вештачки мамец е дупките кои се наоѓаат на врвот на грбот, тие служат како јачина на вибрација со оглед на тежината на главата и секое ниво носи свој интензитет на како и обликот и местолокацијата на дупките. Со помош на шнола ги користиме тие дупки како потенциометар за јачината на тие вибрации во зависност од тоа колку треба и колку сакаме да го провоцираме грабливецот во водата.
Декорот кој го користиме кај чикадите може да биде во најразлични варијанти на металот (златна, сребрена, мат, сјајна итн) како и до најшарените или природните декори. Обично се користат најуспешните природни декори иако најголемите улови доаѓаат од вибрацијата нејзина. Најголемите обожаватели во вода на овој исклучително добар вештачки мамец се кленот, кострежот, сумѓ, штуката, сомот, буцовот, а многу често во големите и длабоки езера се случува и пастрмката да биде добар гостин, така да може да се каже дека е крајно универзален мамец. Тежината и начинот на ловење на овој мамец зависи од водата, нејзиното метално тело дозволува да биде лесно тонливо во длабоки води во зависност од грамажата и големината при што тој факт мора да се земе секако во обзир. Најголем успех имаат во брзи води и во длабоки езера, во поголеми реки и брзаци е неприкосновен противник на сите воблери затоа што ја користат потисната сила на водата и достигаат до перфектна вибрација во горните слоеви. Вториот начин на водење на овој мамец е да се спушти до самото дно (на терените каде што е возможно) и да се убрзува и успорува интервално, нешто како џигинг тактика на водење на мамец со тоа што добиваме цик-цак правец и пребарување на сите слоеви на дното во зависност од вегетацијата односно може слободно да се истражува и да се пробува многу начини на модерен риболов со чикадите. Единствена мана кај чикадите е што се премногу осетливи на терени каде што има ситна вегетација или пак езера и води каде што има многу густа „шума“ во водата, тие освен што ја убиваат вибрацијата туку можат и да ја закочат тотално мамката и да остане таму засекогаш. Исто така при зафрлање се случува трокуките да се заплеткаат меѓу себе и да се осети прилично „мртва“ вибрација на трската, во тој случај ја вадиме и ја отплеткуваме. но со текот на времето и искуството не претставува никаков проблем.
Искуството како најголем фактор вели дека мораме да го имаме овој мамец во приборот доколку сме сериозни спинерџии и риболовци на вештачки мамци затоа што со својот систем на работа чикадата претставува уникатен во својата бранша.
Најзначаен производител е секако Reef Runner меѓутоа на нашиот пазар се наоѓаат локалните DAM чикади, Брзотрз, Лав и Спинер по прилично нормална и пристапна цена.