При вршење на заедничка контрола од страна на овластени лица на Државниот инспекторат за земјоделство – Охрид со рибочуварската служба од концесионерот на рибниот фонд од Охридско Езеро – „Пастрмка 2012“ од Охрид, на 15-ти овој месец во 22:30 часот кај м.в. Рибница во водите на Охридско Езеро затекнати се две лица кои вршеле недозволен риболов со мрежи.
Станува збор за 29-годишниот И.Г. и 32-годишниот Б.С. кои во моментот на контролата ги ваделе мрежите за лов на белвица од водите на Охридско Езеро. Против нив ќе бидат поднесени сооодветни пријави.
При вршењето на контролата од страна на овластените лица од концесионерот и Државниот инспекторат за земјоделство била користена софистицирана опрема за ноќно набљудување и снимање.
Државниот инспекторат за земјоделство од Охрид и концесионерот „Пастрмка 2012“ ги информираат сите риболовци дека ќе се интензивираат контролите на Охридско Езеро, посебно пред претстојниот мрест на охридската пастрмка, и притоа нема да се толерираат никакви прекршувања на Законот за рибарство и аквакултура и подзаконските акти од истиот, и притоа нема да има толеранција ниту за рибокрадците, ниту за риболовците кои риболоват без риболовна легитимација и дозвола.